華富財經
恒指舊制季檢最後一擊
//
恒指服務公司在本周發新聞稿，恒指改革諮詢將於三月一日公佈結果，而季檢就在今天收市後公佈，如青冰早前用常理推測，今次季檢仍然會沿用舊制，新例最快應會在五月季檢時實施。
既然是舊制，又要回到基本步，上市未夠兩年的股票，即使市值夠大，都要市值排名夠高，才有機會入選，跟開青冰的戰友，應該都聽過青冰講了N次，不贅，在開始講候選股前，亦要明白一個風險，由於改革在下星期一公佈，其實恒指公司絕對有機會在今次季檢按兵不動，待改革後才用新例，大大力咁加入新成份股，須知道，如果今次要加新成員，係必須要踢走舊成份股，而早前恒指諮詢內，講到明會將成份股增至65至80隻，簡而言之，如果唔想今次踢走舊成份股得罪大孖沙的話，順理成章今次唔加咪得囉。
用舊制，市值就變得異常重要，青冰看過截至12月31日的數據，有四隻股係比較熱門的，分別係海底撈(6862)、阿里健康(0241)、比亞迪(1211)及中芯(0981)。可能會有戰友問，京東(9618)、網易(9999)、思摩爾(6969)、京東健康(6618)及農夫山泉(9633)，咁大市值都冇份？係，因為舊制受上市時間所限制，佢哋上市是半年內，市值排名要在15位之內，本身京東健康就在前15名，但佢在12月8日市，在截數日時上市都未夠一個月，按規定要排頭5名，至於佢阿媽京東，就受制於本身係第二上市，恒指話計市值時只計香港註冊的股份，所以你睇報價機見到佢有萬億市值，但在港註冊的股份只有7.7億股，計落只有二千幾億，而佢係六月上市，排名亦唔夠高，所以母子都要等改革後了。
反而半年一次的綜合指數檢討，就明朗化好多，基本上在去年下半年上市的新股，只要月均市值夠50億，就肯定入圍，近期劵商先後發了報告，預測入圍的股份都大同小異，反而要花精神估下，佢哋入港股通後，是否北水所愛，泡泡瑪特(9992)及藍月亮(6993)夠大隻，又是國內知名品牌，北水應該必買，一堆物管中，融創服務(1516)及恒大物業(6666)，北水亦應該秤先啲。
最後留意返，無論是恒指或綜指，由宣佈至生效日，今次只有兩星期，以往通常都有三星期嘅，所以指數基金們做嘢的時間就短啲，動力或會更強呀。
//
Search